Actividades campaña 2025-2026: Novas violencias machistas dixitais
As propostas desta anualidade abordan os novos relatos, dinámicas e expresións das violencias machistas no ámbito dixital, articuladas arredor de tres liñas de traballo:
- Comunidades dixitais masculinas e discursos de odio contra as mulleres (manosfera e contidos afíns).
- Tendencias e narrativas que promoven modelos de submisión feminina (coquette, tradwife, soft girl, pick me girl, entre outras).
- Impacto das tecnoloxías dixitais e da intelixencia artificial na creación, reprodución e difusión destas formas de violencia.
Na actualidade, plataformas sociais, espazos audiovisuais e foros en liña funcionan como canais onde medran mensaxes que normalizan a desigualdade e consolidan novas formas de control. Moitas destas narrativas preséntanse cun verniz de liberdade persoal ou estilo identitario, mais en realidade reforzan mandatos tradicionais, romanticizan a obediencia feminina e alimentan a violencia simbólica.
Tanto o avance da manosfera como a popularización das estéticas tradwife ou coquette, xunto co uso da intelixencia artificial para crear contidos sexuais non consentidos, forman parte dun ecosistema patriarcal dixital no que as presións e expectativas recaen especialmente sobre as mulleres máis novas.
Os contidos e materiais serán incorporados e actualizados nesta sección ao longo de todo o ano.
Actualmente estamos a traballar en:
- Campaña de sensibilización sobre as novas violencias machistas dixitais, orientada a sensibilizar e promover pensamento crítico ante estas dinámicas de risco.
- Desenvolvemento de materiais pedagóxicos e de traballo, que inclúen guías, fichas formativas, recursos formativos e materiais descargables.
- Xornada formativa, 23 de abril de 2026: formación e intervencións de persoas expertas para explorar solucións fronte ás violencias machistas dixitais e os seus novos escenarios. Ver programa completo.
- Creación de contidos dixitais pensados para favorecer acomprensión de conceptos clave e o recoñecemento desituacións vinculadas ás violencias machistas no eidotecnolóxico. Todos estes materiais están sendo colgados na nosa sección de recursos.
Acto simbólico 25N
A Deputación da Coruña desde a súa Área de Igualdade propón levar a cabo nesta data un acto simbólico no que participen todas as entidades adheridas á campaña DEFRONTE.
Este acto ten por obxectivo conmemorar as vítimas mortais da violencia machista e pretende facer visibles as violencias que permanecen máis ocultas a través do achegamento a testemuños de mulleres que quixeron sacar á luz a súa experiencia. Así, proponse a lectura dun manifesto que avoga pola erradicación das violencias contra as mulleres e recolle extractos destas historias. Pretende ser unha chamada á toda a sociedade, entendendo a violencia como unha problemática social.
O acto incluirá unha dinámica participativa na que todas as persoas asistentes mirarán de fronte ás novas violencias dixitais e deixarán a súa pegada confrontándoas.
Edicións anteriores
Actividades desenvolvidas na edición de 2024.
Actividades desenvolvidas na edición de 2023.
Actividades desenvolvidas na edición de 2022.