Rematou o mes de novembro, e xa fican atrás as diferentes actividades de conmemoración do  25 de novembro, Día Internacional da Eliminación da Violencia contra as Mulleres. Mais a violencia contra as mulleres, nas súas diferentes formas, aínda está aí. Atendendo aos datos de feminicidios cometidos nos últimos anos podemos afirmar que aínda resta moito traballo por facer. E especialmente este ano, marcado polas consecuencias da pandemia mundial da COVID-19, no que resulta esencial atender ao impacto que as limitacións impostas teñen nas mulleres que están a vivir en situación de violencia, convivindo cos seus agresores. 

Desde esta consciencia chegamos ao final da campaña DE FRONTE á violencia de xénero, impulsada pola Área de Igualdade da Deputación da Coruña. Vaia por diante o agradecemento a todas as persoas que o fixestes posíbel, especialmente a todos os Concellos e entidades adheridas: 84 Concellos e 64 entidades de todo tipo, desde centros educativos a ANPAs, asociacións culturais, empresas, etc., que acollestes esta iniciativa como propia, aumentando o seu alcance e capacidade de sensibilización. Acompañamos estas liñas cunha galería coas imaxes que nos fixestes chegar, mostra de como a mensaxe da campaña se espallou por todo o territorio da provincia da Coruña. 

Grazas pola vosa vontade de unir forzas e traballar de forma coordinada rachando co silencio e apostando pola sensibilización da sociedade e a prevención, contribuíndo á toma de conciencia sobre a magnitude da violencia contra as mulleres, e as consecuencias que ten nas súas vidas e na das súas fillas e fillos.

Desde a Deputación da Coruña reafirmamos aquí o noso compromiso para continuar traballando na creación e dinamización dunha rede de entidades sensíbeis e comprometidas coa igualdade e na erradicación da violencia de xénero, fomentando a creación de sinerxías entre elas, coa Deputación da Coruña, e coa sociedade no seu conxunto.

Por último, grazas tamén a todas as que compartistes connosco a vosa arte, os vosos coñecementos, os vosos poemas e a vosa voz. 

Rematou novembro, pero DE FRONTE non para! 

Deixar unha resposta